ಕರಡಿಗುಡ್ಡದಲ್ಲಿ ಮೊಳಗಿದ ವಿಕೆ ವಿಕೆ ಎಂಬ ಘೋಷಣೆ
ಧಾರವಾಡ
ಧಾರವಾಡ ತಾಲೂಕಿನ ಕರಡಿಗುಡ್ಡ ಗ್ರಾಮದಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ವಿನಯ್ ಕುಲಕರ್ಣಿ ಅವರ ಪರವಾಗಿ ಅವರ ಪತ್ನಿ ಶಿವಲೀಲಾ ಕುಲಕರ್ಣಿ ಅವರು ಅದ್ಧೂರಿ ರೋಡ್ ಶೋ ಮಾಡುವ ಮೂಲಕ ಮತಬೇಟೆ ನಡೆಸಿದರು.
ಕರಡಿಗುಡ್ಡ ಗ್ರಾಮಕ್ಕೆ ಶಿವಲೀಲಾ ಕುಲಕರ್ಣಿ ಅವರು ಆಗಮಿಸುತ್ತಿದ್ದಂತೆ ವಿಕೆ ವಿಕೆ ಎಂಬ ಘೋಷಣೆಗಳು ಮೊಳಗಿದವು. ಕರಡಿಗುಡ್ಡ ಗ್ರಾಮದ ಮೊದಲ ಬಸ್ ನಿಲ್ದಾಣದಿಂದ ಶಿವಲೀಲಾ ಅವರು ಭರ್ಜರಿ ರೋಡ್ ಶೋ ನಡೆಸಿದರು. ಇವರ ರೋಡ್ ಶೋಗೆ ಅಭೂತಪೂರ್ವ ಜನಬೆಂಬಲ ವ್ಯಕ್ತವಾಯಿತು.
ಕರಡಿಗುಡ್ಡ ಗ್ರಾಮದ ಮೊದಲ ಬಸ್ ನಿಲ್ದಾಣದಿಂದ ಆರಂಭಗೊಂಡ ರೋಡ್ ಶೋ ಗ್ರಾಮದ ಕೊನೆಯ ಬಸ್ ನಿಲ್ದಾಣಕ್ಕೆ ಬಂದು ಮುಕ್ತಾಯಗೊಂಡಿತು.
ಈ ವೇಳೆ ಮಾತನಾಡಿದ ಶಿವಲೀಲಾ ಕುಲಕರ್ಣಿ, ಕರಡಿಗುಡ್ಡ ಗ್ರಾಮಕ್ಕೆ ವಿನಯ ಕುಲಕರ್ಣಿ ಅವರು ಪ್ರಮುಖವಾಗಿ ಹೊಲಗಳ ರಸ್ತೆಯನ್ನು ಮಾಡಿ ರೈತರಿಗೆ ಅನುಕೂಲ ಮಾಡಿಕೊಟ್ಟಿದ್ದರು. ಇಲ್ಲಿನ ಕೆರೆಯನ್ನು ಹೂಳೆತ್ತುವ ಮುಖಾಂತರ ಕೆರೆಯಲ್ಲಿ ಅಂತರ್ಜಲಮಟ್ಟ ಹೆಚ್ಚಿಸುವಂತೆ ಮಾಡಿದ್ದರು. ಈಗಿನ ಬಿಜೆಪಿ ಶಾಸಕರು ಹೊಲಗಳ ರಸ್ತೆ ಇರಲಿ, ವಿನಯ್ ಕುಲಕರ್ಣಿ ಅವರು ಮಾಡಿಸಿದ್ದ ಹೊಲಗಳ ರಸ್ತೆಯಲ್ಲಿ ಬೆಳೆ ಮುಳ್ಳು, ಕಂಟಿಗಳನ್ನು ಸಹ ತೆಗೆಸಲು ಅವರಿಂದ ಆಗಿಲ್ಲ. ಕರಡಿಗುಡ್ಡ ಗ್ರಾಮಸ್ಥರು ಸದಾ ಕಾಲ ವಿನಯ್ ಕುಲಕರ್ಣಿ ಅವರ ಬೆನ್ನಿಗೆ ನಿಂತಿದ್ದಾರೆ. ಈಗಲೂ ಅವರು ನಿಲ್ಲುತ್ತಾರೆ ಎಂಬ ಭರವಸೆ ಇದೆ ಎಂದರು.
ವಿನಯ್ ಕುಲಕರ್ಣಿ ಅವರು ಯಾವ ಪರಿಸ್ಥಿತಿಯಲ್ಲಿದ್ದಾರೆ ಎಂಬುದು ಎಲ್ಲರಿಗೂ ಗೊತ್ತೇ ಇದೆ. ಅವರು ಸಂಕಷ್ಟದಿಂದ ಪಾರಾಗಬೇಕು ಎಂದರೆ ಅವರಿಗೆ ಜನಾಶೀರ್ವಾದ ಬೇಕಾಗಿದೆ. ಅವರು ಶಾಸಕರಾಗಿ ಆಯ್ಕೆ ಆಗಿದ್ದೇ ಆದಲ್ಲಿ ಗ್ರಾಮೀಣ ಕ್ಷೇತ್ರದ ಜನ ನೆಮ್ಮದಿಯ ನಿಟ್ಟುಸಿರು ಬಿಡುವಂತಾಗುತ್ತದೆ ಎಂದರು.
ಇದಕ್ಕೂ ಮುನ್ನ ಕರಡಿಗುಡ್ಡ ಗ್ರಾಮಸ್ಥರು ಶಿವಲೀಲಾ ಕುಲಕರ್ಣಿ ಅವರ ಮೇಲೆ ಪುಷ್ಪಮಳೆಗರೆದರು. ಒಟ್ಟಾರೆ ಕರಡಿಗುಡ್ಡ ಗ್ರಾಮದಲ್ಲಿ ಶಿವಲೀಲಾ ಅವರು ಭರ್ಜರಿ ರೋಡ್ ಶೋ ನಡೆಸುವ ಮೂಲಕ ಮತಬೇಟೆ ನಡೆಸಿದರು.
